 | Միկրոալիքային վառարանում մթերքը ջերմամշակվում է հատուկ սարքի` մագնետրոնի առաջացրած գերբարձր հաճախության ալիքների էներգիայով: |
Սննդամթերքի զգալի մասը կարելի է օգտագործել միայն խոհարարական մշակման ենթարկելուց հետո, որով բարելավվում է սննդի համը, և այն դառնում է ավելի դյուրամարս: Ջերմային մշակման դեպքում ոչնչանում են նաև վնասակար բակտերիաները: Սակայն չափից ավելի ջերմային մշակումը նույնպես վնասակար է, որովհետև հանգեցնում է սննդարար ու կենսաբանորեն ակտիվ նյութերի և վիտամինների կորստի: Կերակրի պատրաստումը ներառում է մթերքի նախնական (լվացում, կեղեվում, ոչ պիտանի մասերի հեռացում և կտրտում) ու ջերմային (եփում, տապակում, շոգեհարում և այլն) մշակումը: Որոշ մթերքներ պահանջում են համակցված ջերմամշակում:
Սննդամթերքի խտանյութեր Կերակրատեսակների արագ պատրաստման համար օգտագործվում են սննդամթերքի տարբեր խտանյութեր: Դրանք չորացրած բուսական (բանջարեղեն, միրգ, հացահատիկ) և կենդանական (միս, կաթնամթերք, ձուկ) մթերքի խառնուրդներ են, որոնց ավելացվում են ճարպեր, շաքար, համեմունքներ: Սննդամթերքի խտանյութեր պատրաստում են նախապես եփած ձավարներից, ընդեղենից, բանջարեղենից, ուստի դրանք օգտագործելուց առաջ պետք չէ այլևս եփել, այլ ընդամենը ավելացնել եռացրած ջուր և մի քանի րոպե պահելուց հետո, երբ այն ձեռք է բերում անհրաժեշտ թանձրություն (օրինակ՝ շիլան), կարելի է ուտել: Սննդամթերքի խտանյութերն արտադրվում են աղյուսիկների ձևով (50–200 գ զանգվածով աղյուսիկներն ամուր փաթաթվում են խոնավանթափանց նյութերով ու թղթով) և հատիկավոր (կշռաբաշխում են պոլիէթիլենով կամ այլ թաղանթանյութով պատված թղթե ծրարներում): Սննդամթերքի խտանյութեր են նաև չոր նախաճաշերը, վարսակի և եգիպտացորենի ձողիկները, տապակած կարտոֆիլը (չիփսերը), չոր սոուսները, կեքսերի ալրային խառնուրդները և այլն: Տարբեր տեսակների սննդամթերքների խտանյութերի պահպանման ժամկետները 3–12 ամիս են՝ մինչև +20օC ջերմաստիճանի պայմաններում: Խտանյութերի առավելություններն են նվազագույն զանգվածը, բարձր կալորիականությունը, պահելու և փոխադրելու հարմարավետությունը, օգտագործելու նպատակահարմարությունը և այլն: - Յուրաքանչյուր ժողովուրդ ունի իր ազգային կերակրատեսակները, որոնք, աշխարհագրական, կլիմայական, ազգային, կրոնական և մի շարք այլ գործոններով պայմանավորված, ունեն որոշակի առանձնահատկություններ և կազմում են նրա ազգային խոհանոցը:
|
