Այբուբեն
and 9999 99999ԷՉ
and(9999/99999ԸՊ
and(9999999999ԹՋ
" and9999999999ԺՌ
" and9999999999ԻՍ
"/*--9999999999ԼՎ
"/*--9999999999ԽՏ
-09999999999ԾՐ
-09999999999ԿՑ
/*--*99999conveՀՈւ
/*--*99999s3ՁՓ
099999s3ՂՔ
099999ԱՃՕ
099999ԲՄՖ
099999ԳՅ
099999ԴՆ
199999ԵՇ
and 199999ԶՈ
Արագ Որոնում



Պետական կարգը՝ 
հանրապետություն
Մայրաքաղաքը՝ 
Վիեննա
Տարածքը՝
 83,854 հզ. կմ2
Բնակչությունը՝ 
8,1 մլն
Պետական լեզուն՝ 
գերմաներեն
Դրամական միավորը՝ 
եվրո (մինչև 2002թ.` 
շիլինգ)
Զալցբուրգը Մwցարտի ծննդավայրն է:
Վիեննայի քաղաքապետարանի շենքը
Վիեննայի Մխիթարյան միաբանության մայրավանքի գրադարանը
Ավստրիական Հանրապետություն
Այս ոչ մեծ պետությունը գտնվում է Եվրոպայի կենտրոնում: Արևելքից արևմուտք նրա տարածքի 3/4-ը զբաղեցնում են Ալպերի լեռնաշղթաները, որոնց բարձր, ձյունապատ գագաթները հասնում են մինչև 3500 մ բարձրության (առավելագույնը՝ 3797 մ, Գրոսգլոքներ լեռ): 
Կլիման բարեխառն ցամաքային է, գետահովիտներում՝ չափավոր տաք ու մեղմ: Գետերն արագահոս են: Գլխավոր գետը Դանուբն է՝ Ինն, Էնա, Դրավա,
Մուրավա վտակներով: Կան մոտ 580 լճեր ու լճակներ: Առավել նշանավոր է Բոդենի Մեծ լիճը:
Լեռնալանջերը ծածկված են անտառներով, ավելի բարձր՝ հյութալի խոտով լեռնային մարգագետիններով: Անտառային գոտում, գլխավորապես Բարձր Տաուեռն և Գրոսգլոքներ արգելոցներում, պահպանվել են Եվրոպայի համար հազվադեպ ազնիվ եղջերուն, այծյամը, գորշ արջը, լեռնային արծիվը:
Ավստրիան անցյալում եղել է հզոր ու մեծ տերություն. շուրջ 700 տարի` 1278–1912 թթ., երկիրը կառավարել է Հաբսբուրգների արքայատոհմը: 
Ավստրիական Հանրապետությունը կազմավորվել է 1918 թ-ի նոյեմբերին` Ավստրո-Հունգարական կայսրության փլուզումից հետո:
Ավստրիան եվրոպական այն երկրներից էր, որն առաջիններից մեկը դարձավ գերմանական ագրեսիայի զոհը տակավին Երկրորդ համաշխարհային պատերազմի նախօրեին: 1945 թ-ի ապրիլին խորհրդային բանակը գերմանացիներին դուրս մղեց Վիեննայից և երկրի զգալի մասից, իսկ արևմուտքից հարձակվող անգլո-ամերիկյան դաշնակից զորքերը՝ մնացած մասից, և մինչև 1955 թ. Ավստրիայի տարածքը գտնվում էր հաղթանակած չորս տերությունների (ԱՄՆ, Մեծ Բրիտանիա, ԽՍՀՄ և Ֆրանսիա) վերահսկողության տակ: 1955 թ-ի մայիսին Ավստրիան այդ երկրների հետ կնքեց պայմանագիր, որով նա հռչակում էր իր մշտնջենական չեզոքությունը:
Ավստրիայի բնակչության մեծամասնությունը (97%) ավստրիացիներ են, բնակվում են նաև սլովեններ, հունգարացիներ, չեխեր, հրեաներ, հայեր և այլք:
Ավստրիացիներն առօրյայում խոսում են գերմանական բարբառներով, իսկ գրական գերմաներենը գրավոր կամ պաշտոնական լեզուն է:
Ավստրիայում լեռնահանքային արդյունաբերությունը հիմնված է բազմազան օգտակար հանածոների ոչ մեծ պաշարների վրա: Արդյունահանում են նավթ, գազ, երկաթ, ցինկ, կապար, պղինձ, մագնեզիտ, գրաֆիտ, կերակրի աղ, գորշ ածուխ և այլն: Գործարաններն ու ֆաբրիկաները թողարկում են բարձրորակ տարբեր սարքեր ու մեքենաներ, գործվածքներ ու տպագրական թուղթ:
Երկիրն ունի բազմաճյուղ գյուղատընտեսություն: Մշակում են ցորեն, աշորա, եգիպտացորեն, կարտոֆիլ, խաղող, մրգեղեն, սակայն սեփական հացահատիկն իրենց չի բավարարում, ուստի այն ներկրում են այլ երկրներից: Գյուղատնտեսության գլխավոր ճյուղը անասնաբուծությունն է: Ավստրիան հռչակված է ցեղական խոշոր եղջերավոր կենդանիների բուծմամբ:
Ավստրիայում են ապրել ու ստեղծագործել աշխարհահռչակ կոմպոզիտորներ Մոցարտը, Բեթհովենը, Շուբերտը, Շտրաուսը, Հայդնը, Բրամսը: Ավստրիացիների սիրելի ազգային մեղեդիներն են վիեննական վալսերը, իոդլները (երգեր, որ կատարվում են բարձր տոնով ու ձայնի գեղգեղանքով): Տոնախմբությունների ժամանակ կազմակերպում են նվագախմբերի մրցույթներ, հրապարակներում ժողովուրդը մինչև ուշ գիշեր երգում ու պարում է:
Ամեն տարի միլիոնավոր օտարերկրյա զբոսաշրջիկներ են այցելում Ավստրիա, ծանոթանում նրա տեսարժան վայրերին, որոնցով հարուստ է այդ երկիրը: Նրանք դահուկասահքի են ելնում Ալպերում, բուժվում առողջարանների բուժիչ ջրերով, այցելում հին դղյակներն ու թանգարանները: Շատ թանգարաններ, հինավուրց պալատներ ու զբոսայգիներ կան հատկապես երկրի մայրաքաղաքում՝ գեղատեսիլ Վիեննայում:

Հայերն Ավստրիայում
Դեռևս XVII դարում հայ վաճառականները Պարսկաստանից և Հնդկաստանից Ավստրիա էին բերում մետաքս ու թանկարժեք քարեր, համեմունք ու պերճանքի առարկաներ: 1771 թ-ին ավստրիական արքունիքը հատուկ հրովարտակով տեղի հայերին արտոնել է զբաղվել ոսկերչությամբ ու ակնավաճառությամբ: Այդ տարիներին Վիեննայի արքունի պաշտոնյաների մեջ հիշատակվում է հայ Օգոստինոս Աղամալյանը, որն արքունի թարգմանիչ էր: Ավելի ուշ հարևան Իտալիայից (Տրիեստ քաղաքից) Վիեննա եկան Մխիթարյան միաբանության անդամներ, որոնք ձեռնամուխ եղան գիտաքարոզչական աշխատանքի՝ հավաքելով, ուսումնասիրելով և հրատարակելով հին հայկական ձեռագրեր, եվրոպական ժողովուրդներին ծանոթացրել են այդ գանձերին: Ի դեպ՝ այժմ էլ Վիեննայի Մխիթարյան հայրերը շարունակում են իրենց հայանպաստ բեղմնավոր գործունեությունը, իսկ նրանց մատենադարանում պահպանվում են մոտ 3000 հնագույն հայկական ձեռագրեր, որոնց թվում՝ Թորոս Ռոսլինի, Սարգիս Պիծակի և միջնադարյան այլ մանրանկարիչների նկարազարդած մեծարժեք մատյաններ: XIX դարի սկզբներին Վիեննայի հայ գաղութն այնքան մարդաշատ է եղել, որ Մխիթարյան աբբահայրերը հայ երեխաների համար բացել են գիշերօթիկ դպրոց, հիմնել տպարան, լույս ընծայել դասագրքեր: Վիեննահայերն ունեցել են իրենց ամսագրերը, որոնցից «Հանդես ամսօրյան» (հիմնադրվել է 1887 թ-ին) լույս է տեսնում ցայսօր:
Ներկայումս Ավստրիայում բնակվում է շուրջ 4 հզ. հայ (ճնշող մեծամասնությունը՝ Վիեննայում): Ավստրիահայ համայնքի ազգային կյանքը կազմակերպում են մի շարք բարեգործական և մշակութային կազմակերպություններ: Գործում են Սուրբ Փրկիչ և Սուրբ Հռիփսիմե եկեղեցիները, Մխիթարյան միաբանության Աստվածաբանության ուսումնարանը, «Հովհաննես Շիրազ» շաբաթօրյա դասընթացները: 1984 թ-ին Վիեննայի Սուրբ Հռիփսիմե եկեղեցու բակում տեղադրվել է հուշարձան՝ նվիրված Մեծ եղեռնի զոհերի հիշատակին, իսկ 2001 թ-ից եկեղեցու մերձակա հրապարակը կոչվել է Հայկական հրապարակ: 1979 թ-ից Ավստրիայի Ֆորառլբերգ նահանգը եղբայրացել է Հայաստանի հետ:
Ավստրիացիներն ու վիեննահայ գաղութը զգալի մարդասիրական օգնություն են ցուցաբերել 1988 թ-ի դեկտեմբերյան երկրաշարժից տուժած Սպիտակին ու Գյումրիին:
Ավստրիացի գրող Ֆրանց Վերֆելի «Մուսա լեռան քառասուն օրը» հայտնի վեպը նվիրված է Մեծ եղեռնի ժամանակ մուսալեռցի հայերի ինքնապաշտպանության հերոսական պայքարին: Համայնքի ջանքերով Վիեննայի կենտրոնում կանգնեցվել է Ֆ. Վերֆելի հուշարձանը: